विगत ५ वर्ष देखि प्रविधिको क्षेत्रमा विभिन्न किसिमका कार्यक्रमहरूको माध्यमबाट प्राविधिक क्षेत्रमा योगदान पुर्याउंदै आएको कोड फर चेन्ज ले आर्थिक वर्ष २०२३/२४ देखि आर्थिक वर्ष २०२४/२५ सम्मका लागि राष्ट्रिय नेतृत्वको रूपमा कोड फर चेन्ज काठमाण्डौका पूर्व परियोजना प्रमुख कृष्ण प्रसाद पोख्रेललाई सर्वसम्मत नियुक्त गरेको छ।

कोड फर चेन्जले गत सोमबार आफ्ना मुख्य नेतृत्वमा रहेका र संस्थालाई विभिन्न माध्यमबाट सहयोग गर्दै आएका पदाधिकारीहरू तथा शुभचिन्तकका बिच एक कार्यक्रम गर्दै नेतृत्व परिवर्तनको प्रस्ताव पारित गराएको हो।

विभिन्न व्यक्तित्वहरुको उपस्थिति रहेको सो कार्यक्रममा कोड फर चेन्जका संस्थापक तथा निवर्तमान प्रमुख निराजन क्षेत्रीले आफ्ना भनाइहरू राख्दै आफूले जुन उद्देश्यले संस्थाको सुरु गरेको आज संस्था सोही बाटोमा रहेको र विभिन्न चरणहरूमा उत्कृष्ट नेतृत्व जन्माउँदै जाने आफ्नो उद्देश्यले सार्थकता पाएको कुरा उद्धृत गर्दै नयाँ नेतृत्वमा चयन भएका पोखरेललाई बधाई तथा शुभकामना दिनुभएको छ।

क्षेत्रीले कार्यक्रममा आफूले संस्थाको सुरुवाती दिनदेखि भोगेका सुख दुखका कुराहरू सुनाउँदै आफू कुनै पनि कुराले विचलित नभई खडा भएर काम गरेकोले विधार्थीहरुको साथ पाएको र आज संस्था यो स्थानमा आइपुगेकोले अबका दिनमा संस्थाको यो उचाइ लाई अलिकति पनि खच्किन नदिई पोखरेलले नेतृत्व गर्नुहुन्छ भन्ने कुरामा विश्वस्त रहेकाले संस्थालाई गतिशील बनाउनका लागि नेतृत्व हस्तान्तरण गर्नुपरेको बताउनुभएको छ।

नव नियुक्त प्रमुख पोखरेल तथा उपस्थित व्यक्तित्व हरुले निवर्तमान प्रमुख क्षेत्रीले विगत ५ वर्षमा खेलेको भूमिका उल्लेखनीय र उपलब्धिमूलक रहेको भन्दै धन्यवाद तथा आभार प्रकट गरेका छन् , साथै नव नियुक्त प्रमुख पोखरेलले आफू कोड फर चेन्जको विगतको नेतृत्व देखि प्रभावित भएको र आफू संस्थालाई अझै उत्कृष्ट ढङ्गले अगाडी बढाउन दृढ रहेको पनि प्रतिबद्धता जाहेर गरेका छन्।

कोड फर चेन्जले आयोजना गरेका विभिन्न वर्कसप तथा कार्यक्रमहरू बाट सक्रियता सुरु गरेका पोखरेल संस्थाका सामान्य सदस्य, टेक लिड, एडमिन लिड र काठमाण्डौको परियोजना प्रमुख हुँदै यो स्थान हासिल गर्न सफल भएका हुन्। पोखरेलको नियुक्तिले संस्थाले गतिशीलता पाएको र पोखरेलको निरन्तरको कडा मिहेनतले प्रतिफल पाएको भन्दै संस्थाका विभिन्न तहका पदाधिकारीहरू तथा सदस्यहरू हर्षित भएका छन्।

विगतका ५ वर्षमा कोरोना महामारी, आर्थिक कोषको अभाव लगायतका अनुकूल वातावरणका बाबजुद कोड फर चेन्ज संस्थाले ८ भन्दा बढी राष्ट्रिय कार्यक्रमहरू र ६० भन्दा बढी साना ठुला व्यक्तिगत तथा व्यावसायिक कौशलता विकासका कार्यक्रमहरू आयोजना गरिसकेको छ भने हजारौँ प्रविधि तथा प्रविधि बाहिरका विद्यार्थीहरूमा निकै प्रभाव पारिसकेको छ।

विभिन्न किसिमका अनुकूल वातावरणका बिच उपलब्ध संस्थाको सफलताको चौतर्फी प्रशंसा भएता पनि संस्थालाई यो सफलता कायम राख्न र थप उचाइ हासिल गर्न भने ठुलो चुनौती रहेको छ, संस्थाको राष्ट्रिय तथा अन्तर्राष्ट्रिय विस्तार र विद्यार्थीहरूमा अद्यावधिक कौशलताको विकास संस्थाको मुख्य चुनौती रहेको संस्था भित्र र बाहिरका मानिसहरू बताउँछन्।

संस्थाका सल्लाहकार सन्तोष लम्साल, निवर्तमान प्रमुख निराजन क्षेत्री, कोर टिमका मुख्य सदस्य सुमन गैह्रे, कोड फर चेन्ज काठमाण्डौका सल्लाहकार द्वय विशाल भण्डारी र तेजेन्द्र विक्रम कार्की र काठ्माण्डौ का परियोजना प्रमुख वर्षा पौडेल तथा उपप्रमुख सन्दीप पङ्गेनी उपस्थित रहेको नियुक्तिको कार्यक्रममा सबैले हासिल भएका उपलब्धिहरूको सम्मान गर्दै थप ऊर्जासहित संस्थालाई नयाँ उचाइमा पुर्‍याउन पोख्रेललाई आग्रह गर्दै शुभकामना प्रदान गरेका छन्।