नेपाल सरकारको शिक्षा विज्ञान तथा प्रविधि मन्त्रालयको वेबसाइटमा बिहीबार बिहानदेखि देखिएको समस्या ३५ घण्टा बित्दा समेत समाधान हुन सकेको छैन, डिजिटल नेपाल अभियानको समेत मुख्य अङ्गको रूपमा रहेको मन्त्रालयको वेबसाइट डाउन हुँदा नागरिकको सूचना अधिकार समेत दाउमा परेको छ।
देशको दूर दराजमा रहेका नागरिकले सम्बन्धित मन्त्रालयको सूचना पाउने एउटै माध्यम उक्त वेबसाइट भएता पनि लगभग दुई दिन सम्म पनि वेबसाइट नचल्नुले कति गैरजिम्मेवारीपन देखाउँछ भन्ने कुरा सहजै अनुभव गर्न सकिन्छ।
समस्या बारे टेक कागजका सम्वाददाताले मन्त्रालयमा सम्पर्क गर्दा शिक्षा मन्त्रालय सूचना प्रविधि विभागकी कर्मचारी प्रविना ढुङ्गानाले सर्भरमा समस्या भएको र आफूहरूले राष्ट्रिय सूचना प्रविधि केन्द्रमा सूचना पुर्याइसकेको बताउनुभएको छ।
देशका सबै सरकारी वेवसाइटहरुको सर्भर तथा मर्मतको जिम्मेवारी पाएको राष्ट्रिय सूचना प्रविधि केन्द्रमा सम्पर्क गर्दा केन्द्रका उप निर्देशक सफल श्रेष्ठले शिक्षा मन्त्रालय लगायतका थुप्रै वेबसाइटहरू एउटै सी. प्यानल मा भएको र सर्भरको स्टोरेज फुल भएकाले उक्त समस्या आएको बताउनुभएको छ।
समस्या समाधानको लागि के कस्तो प्रयास गरिएको छ प्रगति विवरण के छ भन्ने प्रश्नमा उहाँले विवरण ठ्याक्कै प्रतिशत मा दिन नसकिने तर समाधानका लागि प्रयास भइरहेकोले छिट्टै समाधान हुनेमा विश्वस्त रहन आग्रह गर्नुभएको छ।
