हामीले राउटर कस्तो हुन्छ भनेर त देखेकै छौँ। इन्टरनेट नचल्दा राउटर कै अगाडि बसेर मोबाइल त सबैले चलाएको नै होला, तर वास्तवमा राउटर के हो र यसले कसरी काम गर्छ भन्ने कुरा एकदम थोरैले नै सोच्यौ होला।
सहज भाषामा भन्नुपर्दा राउटर एउटा यस्तो उपकरण हो जसले हाम्रो डिभाइसहरूलाई इन्टरनेटसँग जोड्ने कार्य गर्दछ। त्यसका साथै यो एउटा नेटवर्किङ यन्त्र पनि हो जसले कम्प्युटर सञ्जालको बिचमा डाटा प्याकेटहरू रुटिङ गर्दछ। यसले सञ्जालमा कुन यन्त्रमा इन्टरनेट ट्राफिक जान्छ त्यसको ट्र्याक राखेर डाटालाई सही गन्तव्यमा पुर्याउने काम पनि गर्दछ।
उदाहरणको रूपमा यदि तपाई आफ्नो स्मार्ट टिभीमा YouTube मा एउटा भिडियो खोल्नुहुन्छ र मोबाइलमा कुनै गीत बजाउनु हुन्छ भने त्यो भिडियो झुक्किएर पनि मोबाइलमा गएर खुल्दैन। यसको लागि राउटरले हरेक डिभाइसलाई दिइएको IP ठेगाना पत्ता लगाउँछ। त्यो ठेगाना राउटरले ISP बाट पाउँछ। त्यसपछि नेटवर्कभित्र रहेका थुप्रै डिभाइसमध्ये राउटरले दिइएको IP ठेगानाको डिभाइसमा मात्र डाटालाई पुर्याउछ। यसैले गर्दा हामीले राउटर मार्फत धेरै डिभाइसहरू प्रयोग गर्न सक्छौँ।
माथि भनिएका कार्य बाहेक राउटरले हाम्रो डाटाहरूलाई सबैभन्दा प्रभावकारी रूपमा रुटिंङ गर्छ। जब राउटरले नेटवर्कमा कतै पठाउन डाटा प्याकेट पाउँछ, त्यसले प्याकेटको गन्तव्य IP ठेगाना हेर्छ र राउटिङ तालिकामा सबैभन्दा छोटो र राम्रो तरिका गणना गर्छ।
राउटर बिना कुनै पनि डिभाइस इन्टरनेटमा जडान गर्न सकिँदैन। यसकै कारण आज घरघरबाट इन्टरनेटको काम गर्न एकदम सहज बनाएको हुँदा यसले हाम्रो जीवनमै ठुलो भूमिका खेलेको छ भन्न गलत नहोला।
