CodeFest 2022 को प्रादेशिक प्रतिस्पर्धा रोचक तथा उत्साहका साथ् सम्पन्न भएसंगै फाइनलको तयारी तिव्र भएको छ।
स्थापनाकाल देखिनै देशमा प्रविधिको विषय पढ्दै आएका विधार्थीहरुलाई विभिन्न वर्कसप, वेबिनार तथा ह्यकाथोनहरु गर्दै व्यक्तिगत तथा व्यावसायिक सिप वृद्धिमा सहयोग पुर्याउंदै आइरहेको कोड फर चेन्जले “CodeFest” नामक राष्ट्रिय स्तरको ह्याकाथोनको प्रादेशिक प्रतिस्पर्धा उत्साहपूर्ण ढङ्गले सम्पन्न गरेको छ।
CodeFest 2022 नेपालमा हुँदै गरेको सबैभन्दा ठुलो ह्यकाथोन हो, जसले आइटिका विद्यार्थीहरूलाई आफूले सिकेका नवीनतम प्रविधिको व्यावहारिक अनुप्रयोगहरू प्रदर्शन गर्न र त्यसका लागि एक्सपोजर अवसर प्रदान गर्ने उद्देश्य लिएको थियो।
उद्देश्य प्राप्तिका लागि कडा मिहेनतका साथ काम गर्दै कोड फर चेन्जले प्रादेशिक र राष्ट्रिय गरी दुई चरणमा छुट्टाएको उक्त ह्याकाथोनको प्रादेशिक चरण भने सफलतापूर्वक सम्पन्न गरेको छ। कोड फर चेन्जको दक्ष मानव संसाधनले बनाएको योजना र कार्यनीति अनुरूप आवश्यक आर्थिक तथा अन्य सहयोग भने ज्योति विकास बैङ्क, जिनिस क्लाउड एकेडेमी लगायतका सङ्घ संस्था तथा कलेजहरूले गरेका छन्।
आयोजकले अप्रिल १४ देखि २१ सम्मको अन्तरालमा ७ वटै प्रदेशमा भौतिक तथा भर्चुअल रूपमा प्रादेशिक प्रतिस्पर्धा सम्पन्न गर्दै विभिन्न ८ टिमहरूलाई फाइनल प्रतिस्पर्धामा ल्याइपुर्याएको छ। प्रादेशिक प्रतिस्पर्धामा प्रदेश १ बाट ११ टिम, मधेस प्रदेश बाट ५ टिम, बागमती प्रदेश बाट ४३ टिम, गण्डकी प्रदेश बाट ९ टिम, लुम्बिनी प्रदेश बाट १८ टिम, कर्णाली प्रदेश बाट २ टिम र सुदूरपश्चिम प्रदेश बाट २ टिम गरी जम्मा ९० फरक टिमहरू सहभागी थिए।
आयोजक टिमले फाइनल प्रतिस्पर्धा भने काठमाण्डौमा आयोजना गर्ने गरी तयारी गरिरहेको छ। फाइनल प्रतिस्पर्धा ८ फरक टिमहरू बिच २ दिनसम्म प्रतिस्पर्धा हुनेछ भने तेस्रो दिन उत्कृष्ट सहभागीहरु लाई प्रोत्साहन स्वरूप पुरस्कार वितरणको कार्यक्रम तय गरिएको छ।
आयोजकका अनुसार दिगो विकासका ७ लक्षहरूमा आधारित रहेर आयोजना गरिएको CodeFest 2022 को फाइनल प्रतिस्पर्धा अप्रिल २८ र २९ गरी दुई दिन टेक्सास कलेजमा हुनेछ भने पुरस्कार वितरणको कार्यक्रम भने अप्रिल ३० मा नेपाल पर्यटन बोर्ड भृकुटी मण्डपमा आयोजना गरिने छ।
