अब ट्राफिक जरिवाना भुक्तानीका लागि बैंक धाउन नपर्ने भएको छ ।

काठमाडौं उपत्यकाका सातवटै ट्राफिक कार्यालयले ट्राफिक नियम उल्लंघन गर्नेलाई मेसिन प्रयोग गरेर जरिवाना तिर्न सक्ने भएका छन् । ट्राफिक कार्यालयले सेवालाई थप प्रविधिमैत्री, परिष्कृत र सहज  बनाउने उद्देश्यसहित काठमाडौंका  ट्राफिक कार्यालयमा किअस्क मसिन विस्तार भएको हो ।

महानगरीय ट्राफिक प्रहरी परिसर सातदोबाटोमा प्रहरी वरिष्ठ उपरीक्षक उमेशराज जोशी र प्रभु पेका अध्यक्ष कुसुम लामाले संयुक्त रुपमा रिबन काटेर ‘प्रभु–पेको किओस्क मेसिन’को उद्घाटन गर्नु भएको छ ।

ट्राफिक नियम उल्लंघन गरेबापत चालकहरूले तिर्नुपर्ने जरिवाना रकम अब प्रभु पेको किअस्क मसिनको प्रयोग गरी भुक्तानी गर्न सकिने व्यवस्था विस्तार गरिएको हो । यसअघि यो व्यवस्था महानगरीय ट्राफिक प्रहरी महाशाखामा लागू भइसकेको छ । सो उद्‍घाटन पश्चात ७ वटै ट्राफिक कार्यालय सेवा सुरू भएको बताइएको छ ।

कार्यक्रममा बोल्दै महाशाखाका प्रमुख प्रहरी वरिष्ठ उपरीक्षक उमेश राज जोशीले ट्राफिक नियम उल्लंघन गरेबापत सवारी प्रयोगकर्ताहरूले जरिवाना तिरी आफ्नो कागजपत्रहरु फिर्ता लिन सरल एवं सहज होस् भन्ने उद्देश्यले प्रभु बैंकको सहकार्यमा नयाँ प्रविधि मातहतका ७ वटा कार्यालयहरुमा बिस्तार गरिएको बताए ।

‘किअस्क’ मेसिनमा सिधै नगद हालेर जरिवाना भुक्तानी गर्न सकिने भएकाले बैंकमा गई लाईन बस्नुपर्ने झन्झटबाट मुक्त भई समयको बचत हुने उनको भनाइ छ ।