७ असार, एजेन्सी । चर्चित इलेक्ट्रोनिक्स ब्राण्ड सामसुङले यो वर्ष सामसुङ मोबाइलको फ्यान संस्करण (फ्यान एडिसन) सार्वजनिक नगर्ने भएको छ। २०२० बाट फ्यान संस्करण एस२० सार्वजनिक गरेको सामसुङले यो वर्ष भने एस२२ एफइ रिलिज नगर्ने भएको हो।
भर्खरै, सामसुङले आफ्ना ग्राहकहरूलाई आइडी, किज, पेमेन्ट मेथड, क्रिप्टो र अन्य सुविधाका लागि सहज होस् भन्ने उद्देश्यले डिजिटल वालेट लन्च गरेको छ।
सामसुङले सन् २०२० मा ग्यालेक्सी एस२० एफई लन्च गरेको थियो। यो स्मार्टफोनले छोटो समयमै ठूलो लोकप्रियता कमाएको थियो। तर अब सामसुङले यसलाई निरन्तरता नदिने संकेत देखाएको छ।
सामसुङले लन्च भएको छोटो समयमै यसको बिक्रीमा राम्रो प्रतिक्रिया प्राप्त गरेको थियो। यो मोडल पछि, ग्यालेक्सी एस२१ एफइ आकर्षक मूल्यमा बजारमा प्रवेश गर्यो। तर यसले बजारमा आफ्नो स्थान बनाउन सकेको छैन।
विज्ञहरूले सार्वजनिक गरेको समय उपयुक्त नभएर यो मोडल असफल भएको अनुमान गरेका छन्। सामसुङले सेप्टेम्बरमा ग्यालेक्सी एस२१ एफइ लन्च गर्ने योजना बनाएको थियो। तर अन्तिममा, यसले आधार मोडेल सुरु भएको लगभग एक वर्ष पछि यस वर्ष जनवरीमा स्मार्टफोन लन्च गर्यो। यसका कारण नै यो मोडल असफल भएको अनुमान पनि बजारमा यथावत् नै छ।
यद्यपी, सामसुङले अगस्ट १० मा घोषणा गरिएको ग्यालेक्सी अनप्याक कार्यक्रममा आफ्नो फोल्डेबल स्मार्टफोन लन्च गर्न सक्ने अनुमान व्यापक भइरहेको छ।
