समयको बेग सँगै देश डिजिटल बन्दै गइरहेको छ । विभिन्न डिजिटल वालेट र मोबाइल बैंकिंगहरुले प्राय: सबैजसो भुक्तानी प्रणालीलाई अनलाइन गरिसके ।

आजको दिनमा कुनै एउटा सानो पान पसल तथा किराना पसलहरूले समेत QR देखि मोबाइल बैंकिंगको माध्यमबाट छिटो र सरल तरिकाले कारोबार गरिरहेका छन्। इन्टरनेट सेवा प्रदायकहरूले पनि डिजिटल भुक्तानीको प्रणाली एडप्ट नगरेका भने हैनन्, प्रायजसो सेवा प्रदायकहरूले सेवा रकम डिजिटल रूपमै लिने र छिटो र सरल तरिकाले सेवा पनि प्रदान गरिरहेका छन् ।

CG नेटको कस्तो छ कारोबार?

CG नेटले पनि पछिल्लो समय आफ्नो सेवा विस्तारलाई ध्यानमा राख्दै विभिन्न ठाउँहरूमा इन्टरनेट जडान गर्दै आइरहेको छ । तर, आफ्ना ग्राहकहरूको गुनासो भने रत्तिभर सुन्ने गरेको पाइँदैन ।

बिल भुक्तानी गरिसकेपछि पनि इन्टरनेट नपाइने र फोन गर्दा पनि स्क्रिनशट देखि स्टेटमेन्ट माग्ने झन्झट त छंदै छ आफ्नो सिस्टमकै कमजोरी हुँदा पनि २४ घण्टा सम्म पनि एक्स्टेण्ड गरिदिँदैन।

भुक्तानी गरिसकेर फोन गर्दा समेत भाइबर, मेलमा स्क्रिनशट, स्टेटमेन्ट लगायतका झन्झटिला काम लाउने र फोन गर्दा पनि समयमा नउठ्ने र उठेपछि पनि केहि समयमा हुन्छ भन्ने, केहिसमयमा काम नभएर सम्पर्क गर्दा पुनः स्क्रिनशट, स्टेटमेन्ट पठाउन लगाएर दुख दिने गरेको एक उपभोक्ताले टेककागजलाई बताए ।

एक उपभोक्ता भन्छन् “मेरो कार्यालयमा CG नेट छ, एकछिन नेट नहुँदा हाम्रो कामनै रोकिन्छ । बिल भुक्तानी गरिसकेर फोन गर्दा प्राविधिकले उठाउनुहुन्छ र स्क्रिनशट तथा स्टेटमेन्ट माग्नुहुन्छ, पठाएर फोन गर्दा फेरी अर्कै प्राविधिकले उठाउनुहुन्छ र फेरी त्यही कुराहरू दोहोर्याएर सोध्नुहुन्छ। पटक पटक यस्ता झन्झटिला दुख पाइसकेपछि पनि गुणस्तरीय सेवा नपाउँदा नराम्रो लाग्छ। ”

 

के यस्तै प्रकारको ग्राहक सेवाले CG नेटको बिस्तारमा सहयोग गर्ला त ? नेट जोड्दाको सस्तो सेवा मात्रै उपभोक्ताको आवश्यकता हो त ?

सामान्य खुद्रा पसलदेखि सेवा प्रदायकहरू यति एड्भान्स भईसके कि भुक्तानीको जानकारी तत्कालै पाउँछन र सेवा, सामाग्रीहरु उपलब्ध गराउँछन् । तर, इन्टरनेट सेवामा प्रतिस्पर्धामा रहेको CG नेटले यो डिजिटल प्रविधिलाई एडप्ट गर्न नसक्नुको कारण के होला ?

यस विषयमा हामीले CG नेटलाई सम्पर्क गरेका थियौं । उहाँले केहि समय अघि सम्म आफ्नो भुक्तानी प्रणाली झन्झटिलो भएको कुरा सहर्स स्वीकार गर्दै आफुले बजारमा CG Pay एप शुरु गरिसकेको र यसबाट भुक्तानी गर्दा समस्या नहुने बताउनु भएको छ। उहाँले थप्दै भन्नुभयो “हामि बजारमा नयाँ भएकाले सिस्टम बनाउन समय लागेको हो बिस्तारै सहज बनाउँदै जाने छौं, अहिले CG Pay बाट भुक्तानी गर्दा ३०% क्यासब्याक समेत रहेको कुरा ग्राहकहरु सम्म पुर्याउन सहयोग गरिदिनुहोला”।

तर CG Pay को बारेमा अनुसन्धान गर्दा यो आफ्नो सेवाका लागि मात्रै नभएर डिजिटल वालेटको रुपमा विकाश गर्न खोजिएको जस्तो देखिन्छ, यत्रो समयसम्म उपभोक्ता हरुलाई झन्झटिलो प्रक्रिया गर्न लगाई दुख दिएर दुख बुझे झैं गरेर उपभोक्ताको भावना संग खेलेर अहिले डिजिटल वालेट शुरु गर्नु बजारीकरणको जाल बिछ्यैइएको हो भनेर बुझ्न त्यति गाह्रो नहोला कि ? यधपी ग्राहकहरुले पनि चासो दिएर यस्ता कुराहरुमा घच्घच्याउन भने आवश्यक देखिन्छ।