“ओहो मेरो फोनको ब्याट्री त ५% भएछ, अब रात भरि चार्ज गरेर छोड्छु।” यस्तो भन्नेमा के तपाईँ पनि पर्नु हुन्छ त? यदि पर्नु हुन्छ भने यो बुझ्नुहोस् कि तपाइले आफ्नो फोनलाई बिस्तारै बिस्तारै मृत्युको मुखमा लग्दै हुनुहुन्छ। कसरी त?

हामीले फोनमा प्रयोग गर्ने ब्याट्री लिथियम ब्याट्री हो। यो प्रकारको ब्याट्री प्रयोग गर्दा केही कुराहरू ख्याल गर्नु पर्ने हुन्छ। लिथियम ब्याट्री एकदमै नाजुक हुने हुँदा यसलाई बढी दबाब दियो भने छिटै यसको आयु सकिन्छ। यस कारण हामीले हाम्रो ब्याट्रीलाई एकदम विशेष ख्याल गरेर प्रयोग गर्नु पर्दछ।

के रात भरि फोन चार्ज गर्नु ठिक होइन त?

रात भरि फोनलाई चार्जमा राख्नु भनेको रातभर फोनको ब्याट्रीलाई काममा लगाउनु जस्तै हो। तपाइले सोच्नु होला १००% पुगेपछि त ब्याट्री आफै चार्ज हुन रोकिन्छ। अनि कुनै विद्युतीय शक्ति नखाने हुँदा फोनलाई रात भर चार्जमा राख्नुले केही असर गर्दैन। तर यो सही होइन। हाम्रो ब्याट्री लगभग चार्ज १००% पुग्न आटे पछि यसले एकदम थोरै विद्युतीय शक्ति लिएर १००% पुर्याउछ। त्यस पश्चात् त्यो १००% ९९% मा झर्ने बित्तिकै ब्याट्रीले फेरी १००% बनाउन शक्ति तान्छ। यसले गर्दा फोनमा रात भरि नै ब्याट्रीले काम गरिरहन्छ।

अर्को कुरा लिथियम ब्याट्रीलाई यदि धेरै विद्युतीय शक्ति दियो भने यसमा ब्लोटिंग भएर चाहिने भन्दा बढी रासायनिक प्रक्रिया हुने हुँदा यसलाई बढी दबाब दिनु ठिक हुँदैन।

कति प्रतिशत चार्ज गर्नु ठिक त?

लिथियम ब्याट्री सबैभन्दा बढी प्रभावकारी रूपमा काम गर्ने साथै लामो समयको लागि टिक्ने बनाउन यसलाई ३०% देखि ८०% को बिचमा राखेर चलाउँदा सबैभन्दा राम्रो हुन्छ।

ब्याट्रीलाई १०% मा पुर्‍याएर चार्ज गर्दा पनि ब्याट्रीलाई एकै पटकमा बढी दबाब हुने हुँदा त्यसले ब्याट्रीको क्षमता घटाउन सक्छ। त्यस कारण ब्याट्रीलाई सही रूपमा प्रयोग गर्न त्यसको चार्जलाई ३०% भन्दा तल झर्न नदिएको नै राम्रो हुन्छ।

यी सुझावहरू ख्याल गरेर लागु गर्नु भयो भने तपाईँ आफ्नो ब्याट्रीको आयुलाई अझ बढी बनाउन सक्नुहुन्छ।