माघ ४ ,काठमाण्डौ। सिजी नेटद्वारा उपलब्ध गराइने इन्टरनेट सेवाहरू ठप्प भए सँगै इन्टरनेट सर्भिस बाट कुनै पनि किसिमका आवश्यक कामकाजहरू गर्न नसकिने भएको छ।

इन्टरनेटमा कुनै पनि किसिमका मोबाइल बैंकिंग, सामाजिक सञ्जाल वा ब्राउजरहरू चलेका छैनन् भने चलेको समयमा समेत खरायो र कछुवाको कथाको पात्र कछुवाकै गतिमा चलिरहेको छ। इन्टरनेटमा देखिएको उक्त समस्याले ग्राहकको शिक्षा, स्वास्थ्य, रोजगारी जस्ता आधारभूत विषयहरुमा बाधा पुर्याउनुका साथै जनजीवन कस्टकर त बनेको छ नै यसले डिजिटल नेपालको अवधारणाको समेत खिल्ली उडाएको छ।

समस्याबारे बुझ्न ग्राहक सेवा केन्द्रमा फोन गर्दा समेत प्राविधिकहरूले सर्भरमा समस्या भएकाले यस्तो समस्या आएको र समाधान हुन लाग्ने समयबारे आफूहरू नै अनविज्ञ रहेको कुरा जानकारी गराएका छन्।

सेवा सुचारुका दिन देखिनै उक्त सेवा प्रदायकको सेवामा कुनै न कुनै समस्या न आएको दिन सायद बिरलै होला, त्यति मात्रै हैन ग्राहकहरूको फोन नलाग्ने, नउठ्ने र समयमा समस्या समाधान नहुने कुरा त दैनिकी जस्तै बनिसकेका छन्। अझ ग्राहक सेवा केन्द्रमा समेत टोल फ्री नम्बरमा सम्पर्क गर्न कठिनाइ हुने र अरु उपलब्ध नम्बरहरुमा फोन गर्दा कयौं पैसा खर्च हुने समेत ग्राहक तथा उपभोक्ताहरुको गुनासो छ।

तत्कालीन इन्टरनेट सेवा प्रदायकहरू महँगो भएको र राम्रो सेवा दिन नसकेको भन्दै चौधरी ग्रुपले सुरु गरेको उक्त सिजी नेटको हाल भने अझ उद्देक्लाग्दो देखिएको छ। पटक पटक बनेका अस्थिर सरकारको संरक्षण पाएको चौधरी ग्रुपले खुलेआम लुटतन्त्र मच्चाउँदा समेत सबै पक्ष मौन देखिएका छन् भने गुणस्तरको कुनै सर्वेक्षण वा निरीक्षण त निकै परको कुरा भैसकेको छ।